അത്യുഷ്ണമഴക്കാലത്തിന്റെ അവസാനമടുത്ത ഒരു സന്ധ്യയ്ക്ക് നിന്റെ ചുവന്ന നിറമുള്ള സ്മാര്ട്ട്ഫോണിലെ ഇന്റര്നെറ്റ് സിഗ്നലുകള് അപ്രത്യക്ഷമാകും.!അസ്വസ്ഥനായി കൈകള് കൂട്ടിത്തിരുമ്മി, നിന്റെ അതിരുകളായ വെളുത്ത ചുവരുകളിലേയ്ക്ക് നോക്കി, ലക്ഷ്യം നഷ്ടപ്പെട്ടവനെപ്പോലെ എത്രയോ നേരം നീയിരിക്കും!.
പെട്ടെന്ന് പൂന്തോട്ടത്തില് പണിയെടുത്തുകൊണ്ടിരുന്ന വൃദ്ധന് മണ്ണ് കുഴഞ്ഞ കാലുകളുമായി അകത്തേയ്ക്ക് ഓടിക്കയറി വന്ന് പറയും: ഈ വീടിരിക്കുന്നിടമൊഴികെ ബാക്കിയൊക്കെ പ്രളയത്തില് നശിച്ചിരിക്കുന്നു എന്ന്!
ഏതോ കഥയില് നിന്നിറങ്ങി വന്ന ദൂതനെപ്പോലെ അയാള് ഭയചകിതനായിരിക്കും.
നീ പുറത്തിറങ്ങി നോക്കാതെയിരിക്കില്ല. ആധാരത്തില് ഭദ്രമായി കുറിച്ചിടപ്പെട്ട അതിരുകള്ക്കുള്ളില് നിന്റെ വീടുള്ള പതിനാറു സെന്റ് ഒരു ദ്വീപായി മാറിയിരിക്കുന്നത് കാണും!
നീയും നിന്റെ കറുത്ത ചെവികളുള്ള വെളുത്ത നായയും പുറംപണിക്കാരന് വൃദ്ധനുമൊഴിച്ച് യാതൊരു ജന്തുവും അവശേഷിക്കുന്നില്ല എന്നും!
ആകാശപ്പരപ്പോളം പാല്ച്ചായയുടെ നിറമുള്ള ജലം ! ജീവന്റെ ആദ്യത്തെ മൈക്രോസ്ഫിയറുകള് ജന്മമെടുത്ത അതേ വിശുദ്ധജലം!
നീ നിന്റെ പണിക്കാരനെ നോക്കും!
ചുക്കിച്ചുളിഞ്ഞ അയാളുടെ കഴുത്തും ചെളിപിടിച്ച കൈകാലുകളെയും വിരണ്ട കണ്ണുകളെയും നീ നോക്കും!
നീ നിന്റെ ഷണ്ഡനായ നായയെ നോക്കും!
തീന്മേശപ്പുറത്തുനിന്നു രണ്ടാപ്പിളെടുത്ത് വൃദ്ധനും രണ്ടു ബിസ്ക്കറ്റ്കഷണം നായയ്ക്കും കൊടുക്കും.
അപ്പോഴാണ് നീ വൃദ്ധന് നട്ടുനനച്ചുവളര്ത്തിയ പല നിറങ്ങളിലുള്ള പൂക്കളെ കാണാനിറങ്ങുക. കാറ്റില് അയല്പ്പക്കത്തെ പൂക്കളുടെ മണമില്ല എന്ന് അതിനകം തിരിച്ചറിഞ്ഞു ഭയന്ന് വിളറി നില്ക്കുകയാവും അവ.
ഒരിക്കല്പ്പോലും സംസാരിച്ചിട്ടില്ലാത്ത മേരി എന്ന സ്ത്രീയും അവളുടെ തയ്യല്ക്കടയും അതിനപ്പുറം അവളെ ഒന്നുമല്ലാതാക്കിക്കൊണ്ട് വളര്ന്ന് വന്ന ടെക്സ്റ്റയില് ഷോപ്പും ശ്രീകൃഷ്ണസ്വാമിയുടെ കൊടിമരവും തടിമില്ലും തമന്നയുടെ ഫോട്ടോ വച്ച സ്റ്റുഡിയോയും സര്വ്വതും എല്ലും കല്ലും കട്ടയുമായി ഒഴുകി നടക്കുകയാവും.
നേരംവൈകലുകള്!!! നഷ്ടപ്പെടലുകള്!!
ശൂന്യതയല്ല നിറവാണിത് എന്ന് നിനക്കു തോന്നിത്തുടങ്ങുകയാവാം.
അനാദിയും അനന്തവുമായ ഊര്ജ്ജം പ്രസരിക്കുന്ന ആകാശം മേലെ!
ഉരുണ്ട ഭൂമിയെ പുതച്ച് ഒരൊറ്റ കടല് കീഴെ!
അതിരുകളിലേയ്ക്ക് നടന്ന് പ്രളയജലത്തിനുമേലെ ഇരുണ്ടുചുവന്ന ചക്രവാളത്തിലേയ്ക്ക് നീ നിന്നെയെടുത്തെറിയും..!
നന്നായിട്ടുണ്ട്...
ReplyDeleteNashtappedalukale ormippikkunna nalloru post.
ReplyDeleteഗംഗേഗേഗേഗേ :))))))))))))))))))))))))))))))))))))))))))))))))))))))))))…………………………………
ReplyDelete……